5 ઓગસ્ટ 2024થી શ્રાવણ મહિનો શરૂ થઈ રહ્યો છે. આ વર્ષે શ્રાવણ મહિનાની શરુઆત મહાદેવના દિવસ એટલે કે સોમવારથી થવાની છે. શ્રાવણ મહિનામાં ભગવાન શિવની વિધિ-વિધાનથી પૂજા કરવામાં આવે છે. ધાર્મિક માન્યતાઓ અનુસાર, શ્રાવણ મહિનામાં ભગવાન શિવની સાચા મનથી પૂજા કરવાથી ઈચ્છિત વરદાન મળે છે. ઈચ્છિત વર માટે કન્યાઓ વર્ષોથી શ્રાવણ મહિનાના સોમવારે ઉપવાસ રાખે છે. એવું માનવામાં આવે છે કે શ્રાવણ મહિનામાં સોમવારે ઉપવાસ રાખવાથી ભગવાન શિવના આશીર્વાદ મળે છે.
શ્રાવણ મહિનામાં સોમવારનો ઉપવાસ પંચામૃત વિના પૂર્ણ થઈ શકતો નથી. પંચામૃતનો ઉપયોગ ઉપવાસ અને પૂજા દરમિયાન ભગવાનને અર્પણ કરવા માટે થાય છે. ધાર્મિક વિધિ પછી તેને પ્રસાદ તરીકે પણ ખાવામાં આવે છે. પરંતુ, જ્યારે વાત મહાદેવની હોય ત્યારે તેમને પંચામૃતથી જ સ્નાન કરાવવામાં આવે છે અને પ્રસાદ તરીકે પણ આપવામાં આવે છે. જો તમે પણ આ વખતે શ્રાવણ મહિનામાં ઉપવાસ રાખવાના છો, તો અમે તમારા માટે પંચામૃતની રેસિપી લઈને આવ્યા છીએ. ચાલો જાણીએ કેવી રીતે બનાવવું પંચામૃત…
પંચામૃત બનાવવા માટેની સામગ્રી
દૂધ – 1 કપ
દહીં – 1 કપ
ઘી – 1 ચમચી
મધ – 1 ચમચી
ગોળ – 1 ચમચી
સૂકામેવા- (કાજુ, કિસમિસ, પિસ્તા, ચિરોંજી, છીણેલું નારિયેળ અને મખાના)
બનાવવાની રીત
પંચામૃત બનાવવા માટે સૌથી પહેલા એક સ્વચ્છ વાસણમાં દૂધ નાખો. હવે આ દૂધમાં દહીં ઉમેરો અને તેને બરાબર મિક્સ કરી લો.
આ પછી આ વાસણમાં સ્વાદ મુજબ ખાંડ ઉમેરો અને તેને ત્યાં સુધી મિક્સ કરો, જ્યાં સુધી ખાંડ ઓગળી ન જાય.
ત્યારબાદ આ વાસણમાં હવે ઘી નાખો અને તેને પણ બરાબર મિક્સ કરો. હવે આ વાસણમાં મધ ઉમેરો.
જ્યારે બધી વસ્તુઓ બરાબર મિક્સ થઈ જાય ત્યારે તેમાં સમારેલા મખાના, કાજુ અને બદામની સાથે ચિરોંજી અને છીણેલું નારિયેળ નાખીને તેને હલાવો.
પ્રસાદ ધરાવતા પહેલા તેમાં તુલસીના થોડા પાન જરુર નાખો. પ્રસાદ ધરાવ્યા પછી તેને પ્રસાદ તરીકે વહેંચો અને તમે પોતે પણ ખાવ.