ગુજરાત ATSએ દેવભૂમિ દ્વારકા જિલ્લામાં મોટી કાર્યવાહી કરી છે. પાકિસ્તાન માટે જાસૂસી કરતા લોકોની દ્વારકામાંથી ધરપકડ કરવામાં આવી છે. પકડાયેલા લોકોની વિશેષ પૂછપરછ કરવામાં આવી છે. આ કેસમાં હજુ પણ કેટલાક મોટા ખુલાસા થઈ શકે છે. પ્રાપ્ત માહિતી અનુસાર આ જાસૂસ કોસ્ટ ગાર્ડની માહિતી પાકિસ્તાનને મોકલી રહ્યો હોવાનું બહાર આવ્યું છે.
મળતી માહિતી મુજબ, ગુજરાત ATSના વડા દીપેન ભદ્રન અને તેમની ટીમે એક બાતમીના આધારે દેવભૂમિ દ્વારકામાં ગુપ્ત ઓપરેશન હાથ ધરીને પાકિસ્તાની જાસૂસને પકડી પાડ્યો હતો. એટીએસે દેવભૂમિ દ્વારકામાં રહેતા દીપેશ ગોહિલ નામના વ્યક્તિને ઝડપી લીધો છે.
પ્રાથમિક પૂછપરછ અને તપાસમાં સામે આવ્યું છે કે દીપેશ ગોહિલ પાકિસ્તાની જાસૂસી સંસ્થા માટે કામ કરતો હતો. દીપેશ ભારતીય જળસીમા પર પેટ્રોલિંગ કરી રહેલા કોસ્ટ ગાર્ડ જહાજોની ગતિવિધિ જાણતો હતો અને આ પ્રવૃત્તિની માહિતી પાકિસ્તાની ગુપ્તચર એજન્સીઓને મોકલતો હતો.
ગુજરાત ATSની ટીમે દીપેશની વિશેષ પૂછપરછ શરૂ કરી છે. દીપેશ પાકિસ્તાની જાસૂસી એજન્સીઓના સંપર્કમાં કેવી રીતે આવ્યો અને કેટલા સમયથી તે દેશવિરોધી પ્રવૃત્તિઓ કરી રહ્યો હતો. આ માહિતી માટે તેને પાકિસ્તાની જાસૂસી સંસ્થાએ જાસૂસી માટે પૈસા આપ્યા હતા. સહિત અનેક મુદ્દાઓ પર તપાસ કેન્દ્રીત કરવામાં આવી છે. દીપેશ પણ હની ટ્રેપમાં ફસાઈ ગયો હોવાની આશંકા છે. તે દિશામાં પણ તપાસ હાથ ધરવામાં આવી છે.