રશિયાએ પોતાના નાગરિકોને સાવધાન કર્યા છે અને કોઈપણ સંજોગોમાં અમેરિકા ન જવાની અપીલ કરી છે. રશિયાના વિદેશ મંત્રાલયે અમેરિકા તેમજ પશ્ચિમી દેશોની યાત્રા ન કરવાની ચેતવણી પણ આપી છે. રશિયાનો દાવો છે કે તે દેશોના અધિકારીઓ ગમે ત્યારે રશિયન નાગરિકોને નિશાન બનાવી શકે છે. રશિયાના વિદેશ મંત્રાલયના પ્રવક્તા મારિયા ઝાખારોવાએ બુધવારે એક પ્રેસ બ્રીફિંગમાં ચેતવણી જારી કરીને કહ્યું કે, અમેરિકા સાથે બગડતા સંબંધોનો માર રશિયાના લોકોને ભોગવવો પડી શકે છે. આ પહેલા અમેરિકાએ પણ પોતાના નાગરિકોને રશિયા ન જવાની સલાહ આપી હતી. અમેરિકાએ કહ્યું હતું કે રશિયન સુરક્ષા અધિકારીઓ તેને હેરાન કરી શકે છે અને તેની અટકાયત પણ થઈ શકે છે.
મંગળવારે, રશિયાના વિદેશ મંત્રાલયે એક સત્તાવાર નિવેદનમાં જણાવ્યું હતું કે, “અમેરિકાની મુસાફરીમાં ખૂબ જોખમ છે, પછી ભલે તે વ્યક્તિગત અથવા સત્તાવાર કારણોસર હોય.” ઝખારોવાએ તો ત્યાં સુધી કહ્યું છે કે અમેરિકા-રશિયાના સંબંધો તૂટવાના આરે છે. ઝખારોવાએ આ દરમિયાન એમ પણ કહ્યું કે રશિયન લોકોએ અમેરિકાના સહયોગી દેશો, કેનેડા અને યુરોપીયન દેશોની મુસાફરી ટાળવી જોઈએ.
રશિયન અને અમેરિકન રાજદ્વારીઓનું કહેવું છે કે યુક્રેનમાં ચાલી રહેલા યુદ્ધને કારણે બંને દેશો વચ્ચેના સંબંધો સૌથી ખરાબ સ્તરે છે. અધિકારીઓના જણાવ્યા અનુસાર, તેમના સંબંધો 1962ના ક્યુબા મિસાઈલ સંકટ પછી સૌથી ખરાબ સ્તરે પહોંચી ગયા છે. રશિયા અને અમેરિકાએ ઘણી વખત એકબીજા પર નાગરિકોને કારણ વગર અટકાયત કરવાનો આરોપ લગાવ્યો છે.
નોંધનીય છે કે ફેબ્રુઆરી 2022માં યુક્રેન યુદ્ધ શરૂ થયા બાદથી અમેરિકા યુક્રેનના સૌથી મોટા ડિફેન્ડર તરીકે ઉભરી આવ્યું છે. અમેરિકાએ અત્યાર સુધીમાં યુક્રેનને 62 અબજ ડોલરની સૈન્ય સહાય આપી છે. ગયા મહિને, બિડેને પણ યુક્રેન દ્વારા અમેરિકન નિર્મિત લાંબા અંતરની મિસાઇલોના ઉપયોગને મંજૂરી આપી હતી, જેણે આ યુદ્ધની આગમાં બળતણ ઉમેર્યું છે.