બાંગ્લાદેશમાં લઘુમતી હિંદુઓ સામેની હિંસા હજુ અટકી નથી. બાંગ્લાદેશની યુનુસ સરકારે પોતે સ્વીકાર્યું છે કે હસીનાની સરકાર ગયા પછી દેશમાં લઘુમતીઓ પર 88 હુમલા થયા છે. બીજી તરફ રાષ્ટ્રીય સ્વયંસેવક સંઘ (RSS)એ પણ આ ઘટનાઓને લઈને ચિંતા વ્યક્ત કરી છે.
કેન્દ્ર સરકારને કડક પગલાં ભરવાની અપીલ
RSSએ બાંગ્લાદેશમાં હિન્દુઓ પર થઈ રહેલા હુમલા અંગે ચિંતા વ્યક્ત કરી છે. આરએસએસના અખિલ ભારતીય પ્રચાર પ્રમુખ સુનીલ આંબેકરે કહ્યું કે કેન્દ્ર સરકારે બાંગ્લાદેશમાં હિન્દુઓ પર થતા અત્યાચારને રોકવા માટે વધુ નક્કર પગલાં લેવા જોઈએ.
નાગપુરમાં એક કાર્યક્રમમાં બોલતા તેમણે કહ્યું કે, ‘બાંગ્લાદેશમાં જે થઈ રહ્યું છે તેનાથી દરેક હિંદુએ રોષ ઠાલવવો જોઈએ.’ તમને જણાવી દઈએ કે બાંગ્લાદેશમાં લઘુમતી હિન્દુ, બૌદ્ધ, જૈન અને અન્ય સમુદાયો પર થયેલા હુમલાની નિંદા કરવા માટે ‘સકલ હિન્દુ સમાજ’ના બેનર હેઠળ આ કાર્યક્રમનું આયોજન કરવામાં આવ્યું હતું.
તેમણે એમ પણ કહ્યું કે અમારા મંદિરો બાળવામાં આવી રહ્યા છે, લૂંટાઈ રહ્યા છે, મહિલાઓ પર અત્યાચાર થઈ રહ્યો છે. જે થઈ રહ્યું છે તેનાથી દરેક હિંદુએ રોષ ઠાલવવો જોઈએ. ઘટનાઓની નિંદા કરવી અને પરેશાન થવું પૂરતું નથી. આપણે ક્રોધ અને ઉદાસીથી આગળ વધવું પડશે.
બાંગ્લાદેશ સરકારે હુમલાની કબૂલાત કરી છે
અગાઉ મંગળવારે, બાંગ્લાદેશે સ્વીકાર્યું હતું કે શેખ હસીના સરકારની હકાલપટ્ટી બાદ દેશમાં લઘુમતીઓ, ખાસ કરીને હિન્દુઓ વિરુદ્ધ હિંસાની 88 ઘટનાઓ બની છે. વચગાળાના સરકારના વડા મોહમ્મદ યુનુસના પ્રેસ સચિવ શફીકુલ આલમે જણાવ્યું હતું કે આ ઘટનાઓમાં 70 લોકોની ધરપકડ કરવામાં આવી છે. લઘુમતીઓ સાથે સંબંધિત ઘટનાઓ અંગે 5 ઓગસ્ટથી 22 ઓક્ટોબર વચ્ચે કુલ 88 કેસ નોંધાયા હતા. તેમણે કહ્યું કે ઘણા વિસ્તારોમાં હિંસાની નવી ઘટનાઓ પ્રકાશમાં આવી હોવાથી કેસ અને ધરપકડમાં વધુ વધારો થઈ શકે છે.