તુર્કીમાં જોરદાર વિસ્ફોટને કારણે 5 લોકોના મોતના સમાચાર છે, જ્યારે 63 લોકો ઘાયલ થયા છે. તમામ ઘાયલોને નજીકની હોસ્પિટલમાં દાખલ કરવામાં આવ્યા છે. મૃત્યુઆંક વધવાની શક્યતા છે. ઘાયલોમાં ઘણાની હાલત ગંભીર હોવાનું કહેવાય છે. આ ઘટના રવિવારે તુર્કીના પશ્ચિમી શહેર ઇઝમિરમાં બની હતી, જ્યાં એક રેસ્ટોરન્ટની ટાંકીમાં જોરદાર વિસ્ફોટ થયો હતો. જેમાં પાંચ લોકોના મોત થયા હતા અને 63 લોકો ઘાયલ થયા હતા. અધિકારીઓએ આ માહિતી આપી હતી.
રેસ્ટોરન્ટમાં લાગેલા સીસીટીવી કેમેરામાં અકસ્માત કેદ થયો હતો. વિસ્ફોટ એટલો જોરદાર હતો કે રોડને પણ ખરાબ રીતે નુકસાન થયું હતું અને જોરદાર વિસ્ફોટના અવાજથી આસપાસના લોકો ગભરાઈ ગયા હતા. જો કે, નજીકની ઇમારતોને માત્ર મામૂલી નુકસાન થયું છે. તુર્કીના ગૃહ પ્રધાન અલી યેરલિકાયાએ સોશિયલ મીડિયા પર જણાવ્યું હતું કે ડઝનેક બચાવકર્મીઓને તાત્કાલિક ઘટનાસ્થળે રવાના કરવામાં આવ્યા હતા. ઇઝમિરના ગવર્નર સુલેમાન અલ્બાને હોસ્પિટલમાં ઘાયલોની મુલાકાત લીધી હતી. તેમણે કહ્યું કે ઘાયલોમાંથી 40 લોકોને સારવાર બાદ રજા આપવામાં આવી છે. બાકીની સારવાર ચાલી રહી છે. રાહત અને બચાવ કામગીરી માટે ટીમ સ્થળ પર હાજર છે.
કસ્ટડીમાં એક શંકાસ્પદ
ટાંકીમાં અચાનક વિસ્ફોટ થતાં આસપાસના લોકોમાં ગભરાટ ફેલાયો હતો. વિસ્ફોટનું સાચું કારણ હજુ સુધી જાણી શકાયું નથી. પરંતુ અધિકારીઓએ જણાવ્યું કે આ ઘટનાના સંબંધમાં એક શંકાસ્પદ વ્યક્તિની અટકાયત કરવામાં આવી છે. પોલીસ તેની પૂછપરછ કરી રહી છે.