બાંગ્લાદેશની ચટગાંવ કોર્ટમાં હિંદુ સાધુ ચિન્મયકૃષ્ણ દાસની જામીન અરજી પર સુનાવણી ફરી એક વાર ટાળી દેવામાં આવી છે. બુધવારે આ અરજીને સુનાવણી માટે આગળ લાવવાની અપીલ ફગાવી દેવામાં આવી હતી. આ અરજી સુપ્રીમ કોર્ટના વરિષ્ઠ વકીલ રવિન્દ્ર ઘોષ દ્વારા દાખલ કરવામાં આવી હતી પરંતુ કોર્ટમાં હાજર વકીલોએ તેનો જોરદાર વિરોધ કર્યો હતો.
વકીલોના વિરોધને કારણે સુનાવણી ખોરવાઈ?
ડેઈલી સ્ટારના અહેવાલ મુજબ બાંગ્લાદેશ માઈનોરિટી વોચના અધ્યક્ષ રવિન્દ્ર ઘોષે કોર્ટમાં ત્રણ અરજી દાખલ કરી હતી. આમાંની એક અરજી ચિન્મયકૃષ્ણની જામીન સુનાવણી આગળ લાવવાની હતી. ઘોષે દાવો કર્યો છે કે સુનાવણી દરમિયાન, ચટગાંવ કોર્ટમાં હાજર સોથી વધુ વકીલો એક થઈ ગયા અને તેમની અરજી સામે હંગામો મચાવ્યો, જેનાથી ન્યાય પ્રક્રિયામાં વિક્ષેપ પડ્યો.
જો કે, સરકારી વકીલ રાયહાનુલ વાજિદ ચૌધરીએ જણાવ્યું હતું કે ઘોષ પાસે ચિન્મયકૃષ્ણની તરફેણમાં જરૂરી વકલત્નામા નથી, જેના કારણે અરજી ફગાવી દેવામાં આવી હતી. ઘોષે આની સામે વાંધો ઉઠાવતા કહ્યું કે, “હું એક વરિષ્ઠ વકીલ છું, અને મેં મારી સહીથી અરજી દાખલ કરી હતી. પરંતુ ચિત્તાગોંગની સ્થિતિ અત્યંત દુર્ભાગ્યપૂર્ણ છે.”
ચિન્મયકૃષ્ણની ધરપકડ પર શા માટે હોબાળો થયો?
દેશદ્રોહના આરોપમાં ચિન્મયકૃષ્ણ દાસની ધરપકડ બાદ બાંગ્લાદેશના ઘણા વિસ્તારોમાં તણાવ વધી ગયો છે. ચિત્તાગોંગ અને રંગપુર જેવા વિસ્તારોમાં લઘુમતી સમુદાય તેમની મુક્તિની માંગ સાથે રસ્તા પર ઉતરી રહ્યો છે. આ મુદ્દાએ ભારત અને બાંગ્લાદેશના સંબંધોને પણ અસર કરી છે. ભારતે આ મામલે ચિંતા વ્યક્ત કરી છે, ત્યારબાદ બાંગ્લાદેશે કોલકાતા અને ત્રિપુરામાં પોતાના રાજદૂતોને બોલાવ્યા છે.
આગામી સુનાવણી ક્યારે થશે?
હવે ચિન્મયકૃષ્ણની જામીન અરજી પર આગામી સુનાવણી જાન્યુઆરી 2024માં થવાની છે. ત્યાં સુધી આ મામલો મોકૂફ રાખવામાં આવ્યો છે. હાલમાં, બાંગ્લાદેશના લઘુમતી સમુદાય અને સરકાર વચ્ચે તણાવ વધી રહ્યો છે, અને પરિસ્થિતિને ઉકેલવા માટે રાજદ્વારી પ્રયાસો ચાલી રહ્યા છે.