રોહિત શર્માના ટેસ્ટમાંથી નિવૃત્તિ બાદ, આ ફોર્મેટમાં ટીમ ઈન્ડિયાના નવા કેપ્ટન માટે સંઘર્ષ ચાલુ છે. ભારત આવતા મહિનાથી ઘરઆંગણે ઇંગ્લેન્ડ સામે પાંચ મેચની ટેસ્ટ શ્રેણી રમવાનું છે. આ પહેલા BCCI એ ટીમ પસંદ કરવાની રહેશે. જોકે, નવો કેપ્ટન કોણ બનશે તે અંગે હજુ સુધી કોઈ ચોક્કસ માહિતી નથી. આ રેસમાં જસપ્રીત બુમરાહ અને શુભમન ગિલના રૂપમાં બે ખેલાડીઓ હતા, પરંતુ સ્કાય સ્પોર્ટ્સ ન્યૂઝના અહેવાલ મુજબ, બુમરાહ આગામી ટેસ્ટ કેપ્ટન બનવાની રેસમાંથી બહાર થઈ ગયો છે. હવે આ રેસ ગિલ અને ઋષભ પંત વચ્ચે છે.
બુમરાહને ટેસ્ટ કેપ્ટનની ભૂમિકા માટે મજબૂત દાવેદાર તરીકે જોવામાં આવતો હતો, પરંતુ અહેવાલોમાં દાવો કરવામાં આવ્યો છે કે તેણે પસંદગીકારોને જાણ કરી દીધી છે કે તે વર્કલોડને કારણે પાંચ મેચની લાંબી ટેસ્ટ શ્રેણીની બધી મેચ રમવાની ગેરંટી આપી શકતો નથી. આવી સ્થિતિમાં, હવે એ વાત સામે આવી રહી છે કે પસંદગીકારો એવી વ્યક્તિને પ્રાથમિકતા આપશે જે આખી શ્રેણી દરમિયાન સતત રમી શકે.
બુમરાહ રેસમાંથી બહાર થયા પછી, પસંદગીકારો ગિલ અથવા પંતમાંથી કોઈ એકને કેપ્ટનશીપ માટે પસંદ કરી શકે છે. જે ખેલાડી કેપ્ટન તરીકે પસંદ ન થાય તેને ઉપ-કેપ્ટન બનાવવામાં આવે તેવી અપેક્ષા છે. ઇંગ્લેન્ડ શ્રેણી માટે ભારતીય ટીમની સત્તાવાર જાહેરાત 24 મે સુધીમાં થવાની અપેક્ષા છે.
