Pakistan vs Ireland Match : બાબર આઝમની કપ્તાનીમાં પાકિસ્તાનની ટીમે ટી20 વર્લ્ડ કપ 2024માં ખરાબ પ્રદર્શન સાથે પોતાની સફર સમાપ્ત કરી દીધી છે. તેને સુપર-8માં સ્થાન મળ્યું નથી, પરંતુ પ્રથમ રાઉન્ડની છેલ્લી મેચમાં પાકિસ્તાને આયર્લેન્ડને 3 વિકેટથી હરાવ્યું છે.
આ મેચ રવિવારે (16 જૂન) ફ્લોરિડામાં રમાઈ હતી.
આ મેચમાં આયર્લેન્ડે 107 રનનો ટાર્ગેટ આપ્યો હતો, જેને હાંસલ કરવા માટે પાકિસ્તાનની ટીમને પરસેવો પાડવો પડ્યો હતો. સારી વાત એ હતી કે કેપ્ટન બાબર છેલ્લી ઘડી સુધી અડગ રહ્યો અને ટીમને જીત તરફ દોરી ગયો. આ ટૂર્નામેન્ટમાં પાકિસ્તાનનો આ બીજો વિજય હતો.
તમને જણાવી દઈએ કે પાકિસ્તાન શરૂઆતની બંને મેચ હારી ગયું હતું. અમેરિકાએ તેને સૌથી પહેલા હરાવી હતી. આ પછી ભારતીય ટીમે કચડી નાખ્યું હતું. આ કારણોસર પાકિસ્તાનની ટીમ સુપર-8 માટે ક્વોલિફાય કરી શકી નથી. જોકે તેણે તેની છેલ્લી બંને મેચ જીતી હતી.
પાકિસ્તાની બોલરોએ આયર્લેન્ડને હરાવ્યું
છેલ્લી મેચમાં બાબર આઝમે ટોસ જીતીને બોલિંગ કરવાનો નિર્ણય કર્યો હતો. આ પછી ફાસ્ટ બોલર શાહીન આફ્રિદી, મોહમ્મદ આમિર અને સ્પિનર ઈમાદ વસીમે તબાહી મચાવી હતી. ત્રણેયએ મળીને 8 વિકેટ લીધી અને આયર્લેન્ડને 9 વિકેટે 106 રન પર રોકી દીધું.
આયરિશ ખેલાડી ગેરેથ ડેલનીએ 19 બોલમાં સૌથી વધુ 31 રન બનાવ્યા હતા. જ્યારે પાકિસ્તાન ટીમ તરફથી શાહીન અને ઈમાદે 3-3 વિકેટ લીધી હતી. જ્યારે આમિરને 2 સફળતા મળી હતી. હરિસ રઉફને એક વિકેટ મળી હતી.
ફરી આયરિશ બોલરોએ પોતાની પુરી તાકાત દેખાડી
107 રનનો નાનો ટાર્ગેટ મળ્યા બાદ પાકિસ્તાનની ટીમને જીતની દાવેદાર માનવામાં આવી રહી હતી, પરંતુ તેને આ જીત એટલી સરળતાથી મળી ન હતી. આયરિશ બોલરોએ પોતાની પૂરી તાકાત બતાવી પાકિસ્તાનને પરસેવો પાડી દીધો હતો. એક સમયે પાકિસ્તાનની ટીમ 95 રનમાં 7 વિકેટ ગુમાવી ચૂકી હતી.
અંતે પાકિસ્તાનને 12 બોલમાં 12 રનની જરૂર હતી. તે સમયે શાહીન આફ્રિદીએ 2 સિક્સર ફટકારીને પાકિસ્તાનને જીત અપાવી હતી. કેપ્ટન બાબર 34 બોલમાં 32 રન બનાવીને અણનમ રહ્યો હતો. શાહિને 5 બોલમાં અણનમ 13 રન બનાવ્યા હતા. આયર્લેન્ડ તરફથી બેરી મેકકાર્થીએ સૌથી વધુ 3 વિકેટ લીધી હતી. જ્યારે કર્ટિસ કેમ્ફરે 2 વિકેટ લીધી હતી.