થોડા અઠવાડિયા પહેલા બાંગ્લાદેશમાં સરકાર ઉથલાવી દેવામાં આવી હતી, જ્યારે હવે બાંગ્લાદેશ ક્રિકેટ બોર્ડ (BCB)ની સ્થિતિ પણ બહુ સારી નથી. ખાલિદ મહમૂદે BCB ડિરેક્ટર અને ક્રિકેટ ઓપરેશન્સના વાઇસ પ્રેસિડેન્ટ પદ પરથી રાજીનામું આપી દીધું છે. મહેમૂદ ઓલરાઉન્ડર ખેલાડી હતો અને ઘણા વર્ષો સુધી બાંગ્લાદેશ માટે ક્રિકેટ રમ્યો હતો. તેણે પોતાના દેશ માટે આંતરરાષ્ટ્રીય સ્તરે 1,000 થી વધુ રન અને 80 વિકેટ લીધી હતી.
ખાલિદ મહમૂદ વર્ષ 2013માં પ્રથમ વખત બાંગ્લાદેશ ક્રિકેટ બોર્ડના ડિરેક્ટર બન્યા હતા. પરંતુ રાજકીય પરિવર્તન સૌથી મોટું કારણ છે જેના કારણે ખાલિદે તેમનો ત્રીજો કાર્યકાળ પૂરો થતાં પહેલા રાજીનામું આપી દીધું છે. તે 11 વર્ષ સુધી ડાયરેક્ટર પદ પર રહ્યો, પરંતુ ખાલિદે છેલ્લા 18 વર્ષથી BCBમાં અલગ-અલગ ભૂમિકામાં કામ કર્યું છે. એક સમયે તેમને ક્રિકેટ ડેવલપમેન્ટ વિભાગનું અધ્યક્ષ પદ પણ આપવામાં આવ્યું હતું.
2006માં ક્રિકેટ છોડી દીધું
ખાલિદ મહમૂદે વર્ષ 1998માં બાંગ્લાદેશ માટે તેની પ્રથમ આંતરરાષ્ટ્રીય મેચ રમી હતી. તેણે 8 વર્ષ પછી એટલે કે 2006માં ક્રિકેટની રમતને અલવિદા કહેવાનો નિર્ણય કર્યો. એક ખેલાડી તરીકે ક્રિકેટ છોડ્યા બાદ તરત જ તેઓ બાંગ્લાદેશ ટીમના મેનેજર બન્યા અને ત્રણ વર્ષ બાદ તેમને રાષ્ટ્રીય ટીમના સહાયક કોચની ભૂમિકા મળી. જોકે તેણે 2013 માં BCB ના ડિરેક્ટર તરીકેનો કાર્યભાર સંભાળ્યો હતો, તેમ છતાં તેણે બાંગ્લાદેશ પ્રીમિયર લીગ અને ઢાકા પ્રીમિયર લીગમાં ટીમોને કોચિંગ આપવાનું ચાલુ રાખ્યું હતું.
અંડર-19 વર્લ્ડ કપની સફળતામાં મહત્વની ભૂમિકા ભજવી હતી
પોતાના 11 વર્ષના કાર્યકાળ દરમિયાન ખાલિદ મહેમૂદે બાંગ્લાદેશમાં ક્રિકેટની પ્રગતિ માટે ઘણા મોટા પગલા લીધા હતા. તેણે બાંગ્લાદેશને 2020માં અંડર-19 ક્રિકેટ વર્લ્ડ કપ જીતવામાં મદદ કરવામાં પણ મહત્વની ભૂમિકા ભજવી હતી. તે દિવસોમાં ખાલિદ વિકાસના વડા હતા. કોચ તરીકે, તેણે ઢાકા ડાયનામાઇટ્સની સાથે BPLમાં 2016નો ખિતાબ જીત્યો છે.
