રોહિત શર્માના ટેસ્ટ ક્રિકેટમાંથી નિવૃત્તિના સમાચારથી બધા ક્રિકેટ પ્રેમીઓ ચોંકી ગયા. આ પછી, પસંદગીકારો સમક્ષ પ્રશ્ન એ ઉભો થયો છે કે ભારતીય ટીમમાં ટેસ્ટ ટીમની જવાબદારી કોણ સંભાળશે. આ સાથે, પ્રશ્ન એ પણ ઊભો થાય છે કે રોહિત શર્માની જગ્યાએ ટેસ્ટમાં કોણ ઓપનિંગ કરવા આવશે. ભારત દ્વારા રમાયેલી પહેલી મેચોમાં રોહિત શર્મા અને યશસ્વી જયસ્વાલ ઓપનિંગ બેટ્સમેન તરીકે આવી રહ્યા હતા, પરંતુ રોહિતની નિવૃત્તિ પછી, આ સ્થાન કોઈ યુવા ખેલાડીને આપી શકાય છે.
આ યુવા ખેલાડી રોહિત શર્માનું સ્થાન લેશે
ઇંગ્લેન્ડ પ્રવાસ માટે જતી ભારતીય ક્રિકેટ ટીમની જાહેરાત હજુ સુધી કરવામાં આવી નથી. આ સાથે, ક્રિકેટ ચાહકો નવા ટેસ્ટ કેપ્ટનના નામની પણ રાહ જોઈ રહ્યા છે. રોહિત શર્માની નિવૃત્તિ બાદ, સાઈ સુદર્શનને ઇંગ્લેન્ડ પ્રવાસ માટે પસંદ કરી શકાય છે. સાઈ સુદર્શન પણ IPLમાં શાનદાર પ્રદર્શન કરી રહ્યો છે. સુદર્શને ૧૩ મેચમાં ૬૩૮ રન બનાવ્યા છે અને તે આ ટુર્નામેન્ટમાં અત્યાર સુધીનો સૌથી વધુ રન બનાવનાર ખેલાડી છે.
આ યાદીમાં અભિમન્યુ ઈશ્વરનનું નામ પણ સામેલ છે. અભિમન્યુને ઘણી વખત ઇન્ડિયા એ-ટીમ માટે પસંદ કરવામાં આવ્યો છે. રોહિત શર્માના સ્થાને, અભિમન્યુ ઈશ્વરન પણ ઇંગ્લેન્ડ પ્રવાસ પર ભારતની સિનિયર ટીમમાં ડેબ્યૂ કરી શકે છે.
ગિલ અને રાહુલ કયા નંબર પર?
મીડિયા રિપોર્ટ્સ અનુસાર, શુભમન ગિલ ત્રીજા નંબર પર બેટિંગ કરવા આવી શકે છે. જ્યારે કેએલ રાહુલ મધ્યમ ક્રમમાં બેટિંગ કરી શકે છે. રોહિત શર્માના નિવૃત્તિના થોડા દિવસો પછી, વિરાટ કોહલીએ પણ ટેસ્ટ ક્રિકેટમાંથી નિવૃત્તિની જાહેરાત કરી, જેના પછી ભારતની ટેસ્ટ ટીમમાં મોટો ફેરફાર જોવા મળી શકે છે. બીસીસીઆઈ ટૂંક સમયમાં કેપ્ટન અંગે પણ નિર્ણય લઈ શકે છે.
