ગુજરાતના જામનગરના જામસાહેબ શત્રુશૈલીસિંહજીએ શુક્રવારે તેમના વારસની જાહેરાત કરી હતી. તેમણે દશેરાના અવસર પર તેમના ભત્રીજા અને ભૂતપૂર્વ ક્રિકેટર અજય જાડેજાને તેમના અનુગામી તરીકે જાહેર કર્યા હતા. નવાનગરના નવા જામ સાહેબ બન્યા બાદ અજય જાડેજાની સંપત્તિમાં પણ વધારો થયો છે. ઘણા અહેવાલોમાં દાવો કરવામાં આવ્યો છે કે તેની નેટવર્થ ભૂતપૂર્વ ભારતીય કેપ્ટન વિરાટ કોહલી કરતા વધુ થઈ ગઈ છે.
અજય જાડેજા (53) એ 1992 થી 2000 વચ્ચે ભારત માટે 196 ODI અને 15 ટેસ્ટ મેચ રમી હતી. તેઓ જામનગરના રાજવી પરિવારના છે. જામનગરના મહારાજા શત્રુશૈલ્યસિંહજી જાડેજા એ ક્રિકેટરના પિતા દોલતસિંહજી જાડેજાના પિતરાઈ ભાઈ છે. દોલતસિંહ જાડેજા 1971 થી 1984 દરમિયાન જામનગરથી ત્રણ વખત સાંસદ રહ્યા હતા.
નવાનગરના નવા જામ સાહેબ બન્યા બાદ અજય જાડેજાની નેટવર્થ 1400 કરોડને વટાવી ગઈ છે. જ્યારે પૂર્વ ભારતીય કેપ્ટન વિરાટ કોહલીની નેટવર્થ લગભગ એક હજાર કરોડની આસપાસ રહેવાની ધારણા છે, એટલે કે જામ સાહેબ બન્યા બાદ અજય કોહલી કરતા પણ વધુ અમીર બની ગયો છે.
મહારાજા શત્રુશૈલીસિંહજી પણ એક ક્રિકેટર હતા, જેમણે 1966-67માં રણજી ટ્રોફીમાં સૌરાષ્ટ્રની કપ્તાની કરી હતી અને સૌરાષ્ટ્ર ક્રિકેટ એસોસિએશનના વડા તરીકે સેવા આપી હતી. તેમના પિતાના મૃત્યુ પછી, તેમને 3 ફેબ્રુઆરી 1966ના રોજ નવાનગરના વડા બનાવવામાં આવ્યા હતા અને નેપાળના રાજવી પરિવારના સભ્ય સાથે તેમના લગ્ન થયા હતા, જેમને પાછળથી તેમણે છૂટાછેડા લીધા હતા. આ પરિવાર મહાન ક્રિકેટર રણજીતસિંહ જાડેજાના વંશજ છે, જેમણે 1907 થી 1933 સુધી નવાનગર પર શાસન કર્યું હતું.