Manipur Violence: મણિપુરમાં હિંસા અટકવાનું નામ નથી લઈ રહી. તાજેતરની માહિતી અનુસાર, તેંગનોપલ જિલ્લામાં આતંકવાદીઓ અને એક જ સમુદાયના ગ્રામીણ સ્વયંસેવકો વચ્ચે ગોળીબાર થયો હતો જેમાં ચાર સશસ્ત્ર માણસો માર્યા ગયા હતા. આ અંગેની માહિતી પોલીસ દ્વારા આપવામાં આવી હતી. અહેવાલ છે કે યુનાઇટેડ કુકી લિબરેશન ફ્રન્ટ (UKLF) ના એક આતંકવાદી અને તે જ સમુદાયના ત્રણ ગ્રામીણ સ્વયંસેવકો શુક્રવારે મોલનોમ વિસ્તારમાં એક એન્કાઉન્ટરમાં માર્યા ગયા હતા.
આ પછી, ગ્રામીણ સ્વયંસેવકોએ ગુસ્સામાં સ્વ-ઘોષિત યુકેએલએફ ચીફ એસએસ હોકીપનું ઘર સળગાવી દીધું. પોલીસે જણાવ્યું કે ગોળીબાર પાછળનું કારણ પાલેલ વિસ્તારમાં ટેક્સ કલેક્શનને નિયંત્રિત કરવાનું હોઈ શકે છે. સુરક્ષા દળોએ સર્ચ ઓપરેશન શરૂ કર્યું છે પરંતુ હજુ સુધી કોઈની ધરપકડ કરવામાં આવી નથી. સ્થિતિ નિયંત્રણમાં છે.
બોમ્બ બ્લાસ્ટમાં પૂર્વ MLAની પત્નીનું મોત
અહીં, મણિપુરના કાંગપોકપી જિલ્લામાં બોમ્બ બ્લાસ્ટમાં પૂર્વ ધારાસભ્યની પત્નીનું મોત થયું હતું. જણાવવામાં આવી રહ્યું છે કે સૈકુલના પૂર્વ ધારાસભ્ય યુમથોંગ હાઓકિપના ઘરની પાસે સ્થિત એક ઘરમાં શનિવારે સાંજે બોમ્બ વિસ્ફોટ થયો હતો. હોકીપની બીજી પત્ની સપમ ચારુબાલા વિસ્ફોટમાં ઘાયલ થઈ હતી. ચારુબાલાને સૈકુલની હોસ્પિટલમાં લઈ જવામાં આવી, જ્યાં સારવાર દરમિયાન તેનું મૃત્યુ થયું. પોલીસ બ્લાસ્ટની તપાસ કરી રહી છે.