રાજધાની દિલ્હીના વિકાસને ઝડપી બનાવવા માટે, મુખ્યમંત્રી રેખા ગુપ્તાની અધ્યક્ષતામાં બુધવારે (16 એપ્રિલ) ‘એક્સ્પેન્ડીચર ફાઇનાન્સ કમિટી’ (EFC)ની પ્રથમ બેઠક યોજાઈ હતી. જેમાં ઘણા મોટા નિર્ણયો લેવામાં આવ્યા હતા. બેઠકમાં યમુનાની સફાઈ, નરેલામાં હાઈ સિક્યોરિટી જેલ અને સાર્વજનિક પરિવહનને સ્વચ્છ અને હરિયાળું બનાવવા ચાર્જિંગ સ્ટેશન જેવા મહત્વના પ્રસ્તાવોને મંજૂરી આપવામાં આવી છે.
બેઠકમાં નિર્ણય લેવામાં આવ્યો હતો કે યમુનાને પ્રદૂષણ મુક્ત બનાવવા માટે દિલ્હી સરકાર રૂ. 3140 કરોડના ખર્ચે 27 વિકેન્દ્રિત સીવેજ ટ્રીટમેન્ટ પ્લાન્ટ (STP) સ્થાપશે અને આ પ્રોજેક્ટ 18 મહિનામાં પૂર્ણ કરવામાં આવશે. આ ઉપરાંત ગેરકાયદે વસાહતોમાં ગટરની સમસ્યાના નિરાકરણ અને યમુનામાં ગટરનું પાણી વહેતું અટકાવવા માટે પણ નક્કર પગલાં લેવામાં આવશે.
ઉચ્ચ સુરક્ષા જેલ
આ ઉપરાંત, બેઠકમાં દિલ્હીની જેલોમાં સતત વધી રહેલી ભીડને ધ્યાનમાં રાખીને નરેલામાં એક ઉચ્ચ સુરક્ષા જેલ બનાવવાની મંજૂરી આપવામાં આવી છે. આ જેલમાં 256 કેદીઓની ક્ષમતા હશે અને તેના નિર્માણ પાછળ 148.58 કરોડ રૂપિયાનો ખર્ચ થશે. આ જેલ સંપૂર્ણપણે નવી સુવિધાઓ અને ચુસ્ત સુરક્ષાથી સજ્જ હશે, જે પાટનગરની જેલ વ્યવસ્થાને મોટો વેગ આપશે. આ નિર્ણય દિલ્હીની જેલ વ્યવસ્થાને સુરક્ષિત બનાવવા માટે લેવામાં આવ્યો છે.
ઇલેક્ટ્રિક બસો માટે ચાર્જિંગ સ્ટેશન
ઉપરાંત, દિલ્હીમાં ગ્રીન પબ્લિક ટ્રાન્સપોર્ટને પ્રોત્સાહન આપવા માટે, દ્વારકા, ISBT અને ક્લસ્ટર બસ ડેપોમાં ઇલેક્ટ્રિક બસો માટે ચાર્જિંગ સ્ટેશનો સ્થાપવામાં આવશે. આ માટે 107.02 કરોડની રકમ મંજૂર કરવામાં આવી છે. આ યોજના રાજધાનીમાં પ્રદૂષણ ઘટાડવામાં અને ઈ-મોબિલિટીને પ્રોત્સાહન આપવામાં મદદ કરશે. બેઠકમાં મુખ્યમંત્રીએ સ્પષ્ટપણે જણાવ્યું હતું કે આ તમામ પ્રોજેક્ટો નિયત સમયમર્યાદામાં પૂર્ણ કરવા જોઈએ જેથી પાટનગરના પાણી, પરિવહન અને પર્યાવરણ ક્ષેત્રે નક્કર સુધારાઓ લાવી શકાય.