ગુજરાતના ભરૂચ જિલ્લાના અંકલેશ્વર ઔદ્યોગિક વિસ્તારની એક ફેક્ટરીમાંથી પોલીસે પ્રતિબંધિત મેથામ્ફેટામાઈન અને 427 કિલો અન્ય ડ્રગ્સ જપ્ત કર્યા છે. પ્રતિબંધિત મેથામ્ફેટામાઈનની કુલ કિંમત 14 લાખ રૂપિયા હોવાનું કહેવાય છે.
એક અધિકારીએ સોમવારે આ જાણકારી આપી. તેમણે કહ્યું કે આ કેસમાં એક વ્યક્તિની ધરપકડ કરવામાં આવી છે. અંકલેશ્વર જીઆઈડીસી વિસ્તારમાં આવેલા અવસર એન્ટરપ્રાઈઝમાંથી આ ડ્રગ્સ જપ્ત કરવામાં આવ્યું છે. આ પદાર્થોને પુષ્ટિ માટે ફોરેન્સિક સાયન્સ લેબોરેટરીમાં મોકલવામાં આવ્યા છે.
સ્પેશિયલ ઓપરેશન ગ્રુપના પોલીસ ઈન્સ્પેક્ટર આનંદ ચૌધરીએ જણાવ્યું હતું કે જિલ્લા એસઓજી અને સુરત પોલીસની ટીમે રવિવારે રાત્રે ફેક્ટરી પર દરોડો પાડ્યો હતો. આ દરમિયાન તેમની પાસેથી 14.10 લાખની કિંમતનું 141 ગ્રામ એમડી જપ્ત કરવામાં આવ્યું હતું. તેમણે વધુમાં જણાવ્યું કે અત્યાર સુધીમાં એક વ્યક્તિની ધરપકડ કરવામાં આવી છે. હાલ આ કેસની તપાસ ચાલી રહી છે.
અગાઉ પણ સંયુક્ત ઓપરેશન ચલાવીને કોકેન જપ્ત કરવામાં આવ્યું હતું
અગાઉ 13 ઓક્ટોબરે ગુજરાત અને દિલ્હી પોલીસે સંયુક્ત ઓપરેશન હાથ ધરીને અંકલેશ્વરમાં આવેલી અવકાર ડ્રગ્સ લિમિટેડ ફેક્ટરીમાંથી રૂ. 5,000 કરોડની કિંમતનો 500 કિલોથી વધુ કોકેઈન જપ્ત કર્યો હતો. આ કાર્યવાહીના એક સપ્તાહ બાદ અહીં દરોડો પાડવામાં આવ્યો હતો.
આના થોડા દિવસો પહેલા દિલ્હી પોલીસે રાજધાનીમાં એક વેરહાઉસ પર દરોડા પાડીને 562 કિલો કોકેઈન અને 40 કિલો હાઈડ્રોપોનિક ગાંજો જપ્ત કર્યો હતો. દિલ્હીના રમેશ નગરમાં આવેલી એક દુકાન પર દરોડો પાડવામાં આવ્યો હતો, જ્યાંથી 208 કિલો કોકેઈન મળી આવ્યું હતું. પોલીસે જણાવ્યું હતું કે તપાસમાં બહાર આવ્યું છે કે આ પ્રતિબંધિત દવા ફાર્મા સોલ્યુશન સર્વિસીસ નામની કંપનીની છે જે અંકલેશ્વરની અવકાર ડ્રગ્સ લિમિટેડ કંપનીમાંથી આવી હતી.
