ENG vs SL : શ્રીલંકાના ઈંગ્લેન્ડ પ્રવાસની શરૂઆત 21 થી 25 ઓગસ્ટ દરમિયાન માન્ચેસ્ટરમાં પ્રથમ ટેસ્ટથી થશે. બીજી ટેસ્ટ 29 ઓગસ્ટથી 2 સપ્ટેમ્બર સુધી લોર્ડ્સમાં રમાશે જ્યારે ત્રીજી ટેસ્ટ 6 થી 10 સપ્ટેમ્બર સુધી ઓવલમાં રમાશે.
ઈંગ્લેન્ડ અને શ્રીલંકા વચ્ચે 21 ઓગસ્ટથી ત્રણ મેચની ટેસ્ટ શ્રેણી શરૂ થઈ રહી છે. આ સિરીઝની શરૂઆત પહેલા જ યજમાન ઈંગ્લેન્ડને જોરદાર ફટકો પડ્યો છે. વર્લ્ડ ટેસ્ટ ચેમ્પિયનશિપ પોઈન્ટ ટેબલમાં શ્રીલંકાની ટીમ ચોથા સ્થાને અને ઈંગ્લેન્ડની ટીમ છઠ્ઠા સ્થાને છે. આ સિરીઝ બંને ટીમો માટે ઘણી મહત્વની છે. ઈંગ્લિશ ટીમનો સ્ટાર ઓલરાઉન્ડર અને કેપ્ટન બેન સ્ટોક્સ આ સિરીઝમાં રમી શકશે નહીં. સ્ટોક્સ ઈજાના કારણે શ્રીલંકા સામેની શ્રેણીમાંથી બહાર છે.
સ્ટોક્સ હાલમાં ધ હન્ડ્રેડ ક્રિકેટ લીગમાં રમી રહ્યો હતો અને ત્યાં તેને ડાબા હાથની હૅમસ્ટ્રિંગમાં ઈજા થઈ હતી. ઈજા બાદ તે ખૂબ જ પીડામાં જોવા મળ્યો હતો. આ પછી તેને ક્રેચની મદદથી મેદાનની બહાર લઈ જવામાં આવ્યો હતો. બેન સ્ટોક્સ ધ હન્ડ્રેડમાં નોર્ધન સુપરચાર્જર્સ ટીમનો એક ભાગ હતો. તે મેચમાં ઓપનિંગ કરવા માટે બહાર આવ્યો હતો, પરંતુ અચાનક તેના સ્નાયુઓ તણાઈ ગયા અને તેને મેદાન છોડવું પડ્યું. તેની ટીમના બે સભ્યો તેને ખભા પર લઈને બહાર નીકળ્યા. સ્ટોક્સ બે રન બનાવીને રિટાયર્ડ હર્ટ થયો હતો.
મેદાન છોડ્યા બાદ સ્ટોક્સને સ્ટ્રેચર પર બેસાડીને એમ્બ્યુલન્સ મારફતે સારવાર માટે લઈ જવામાં આવ્યો હતો. જોકે, થોડા સમય પછી તે ફરી પાછો ફર્યો અને ડગઆઉટમાં જોવા મળ્યો. મતલબ કે તેની ઈજા બહુ ગંભીર નથી. જોકે, તે સમયે પણ સ્ટોક્સ ક્રેચનો ઉપયોગ કરતા જોવા મળ્યા હતા.
શ્રીલંકાના ઈંગ્લેન્ડ પ્રવાસની શરૂઆત 21 થી 25 ઓગસ્ટ દરમિયાન માન્ચેસ્ટરમાં પ્રથમ ટેસ્ટથી થશે. બીજી ટેસ્ટ 29 ઓગસ્ટથી 2 સપ્ટેમ્બર સુધી લોર્ડ્સમાં રમાશે જ્યારે ત્રીજી અને અંતિમ ટેસ્ટ 6 થી 10 સપ્ટેમ્બર સુધી ઓવલમાં રમાશે. વર્લ્ડ ટેસ્ટ ચેમ્પિયનશિપ 2023-25ના દૃષ્ટિકોણથી આ શ્રેણી બંને ટીમો માટે મહત્વપૂર્ણ છે. WTC સ્ટેન્ડિંગમાં શ્રીલંકા (50 પોઈન્ટ) ચોથા સ્થાને છે, જ્યારે ઈંગ્લેન્ડ (36.54 પોઈન્ટ) છઠ્ઠા સ્થાને છે.