Sports News:ટીમ ઈન્ડિયાના સ્ટાર બેટ્સમેન રોહિત શર્મા અને વિરાટ કોહલી આ વખતે ભારતીય ક્રિકેટ કંટ્રોલ બોર્ડ (BCCI)ની ડોમેસ્ટિક ટુર્નામેન્ટ દુલીપ ટ્રોફીમાં રમતા જોવા મળશે. ભારતીય ટીમના પસંદગીકારોએ આ નિર્ણય બાંગ્લાદેશ સામે સપ્ટેમ્બરમાં શરૂ થઈ રહેલી ટેસ્ટ શ્રેણીને ધ્યાનમાં રાખીને લીધો છે. પસંદગીકારો આ ડોમેસ્ટિક સિઝનમાં ટીમ ઈન્ડિયાના સિનિયર ખેલાડીઓને રમતા જોવા માંગતા હતા. આંધ્રપ્રદેશના અનંતપુરમાં 5 સપ્ટેમ્બરથી દુલીપ ટ્રોફી શરૂ થઈ રહી છે.
ઈન્ડિયન એક્સપ્રેસના અહેવાલ મુજબ આ ટૂર્નામેન્ટમાં વિરાટ કોહલી અને રોહિત શર્મા સહિત ટીમ ઈન્ડિયાના તમામ મહત્વના ખેલાડીઓ ચારેય ઝોનની ટીમોમાં રમતા જોવા મળશે. જેમાં કેએલ રાહુલ, શુભમન ગિલ, અક્ષર પટેલ, રવિન્દ્ર જાડેજા, યશસ્વી જયસ્વાલ, સૂર્યકુમાર યાદવ અને કુલદીપ યાદવ જેવા ખેલાડીઓ જોવા મળશે. જો કે, તેમાં સ્ટાર ફાસ્ટ બોલર જસપ્રિત બુમરાહ જોવા મળે તેવી કોઈ શક્યતા નથી કારણ કે પસંદગીકારો તેને લાંબો સમય આરામ આપવા માંગે છે.
ભારતીય ટીમે બાકીના વર્ષમાં (છેલ્લા 4 મહિનામાં) 10 ટેસ્ટ મેચ રમવાની છે, જેમાંથી 5 ટેસ્ટ ઓસ્ટ્રેલિયા સામે તેની ધરતી પર રમાશે. આવી સ્થિતિમાં પસંદગીકારો આ સ્ટાર ફાસ્ટ બોલરને વધુ આરામ આપવાના પક્ષમાં છે. વરિષ્ઠ પસંદગી સમિતિ બાંગ્લાદેશ પ્રવાસ માટે બુમરાહની ઉપલબ્ધતા અંગે પણ ચર્ચા કરશે.
દુલીપ ટ્રોફીની આ સીઝન 5 થી 24 સપ્ટેમ્બર વચ્ચે રમાશે. પસંદગીકારો ઇચ્છે છે કે તેમના ખેલાડીઓ મહત્વપૂર્ણ લાલ બોલની સિઝન પહેલા ડોમેસ્ટિક ક્રિકેટ રમીને બોલ સાથે એડજસ્ટ થાય. ભારત અને બાંગ્લાદેશ વચ્ચે બે ટેસ્ટ મેચની શ્રેણીની પ્રથમ ટેસ્ટ 19 સપ્ટેમ્બરથી ચેન્નાઈમાં રમાશે.