Israel Hamas War : બુધવારે ઈરાનની રાજધાની તેહરાનમાં હમાસના વડા ઈસ્માઈલ હનીહની હત્યા કરવામાં આવી હતી. આ હત્યાની જવાબદારી ઇઝરાયલે ખુલ્લેઆમ લીધી નથી તેમ છતાં ઇરાન અને હમાસનો દાવો છે કે હમાસના વડાના મૃત્યુ માટે ઇઝરાયેલ જવાબદાર છે.
ઈરાન સહિત ઘણા દેશોએ ઈસ્માઈલ હાનિયાના નિધન પર શોક વ્યક્ત કર્યો છે. સાથે જ ઈરાને ઈઝરાયલને ખુલ્લેઆમ ચેતવણી પણ આપી છે.
ઈરાનની ધમકી બાદ ઈઝરાયેલ એલર્ટ
ઈરાનના સર્વોચ્ચ નેતા આયાતુલ્લા અલી ખમેનીએ ઈઝરાયેલ પર હુમલો કરવાનો આદેશ જારી કર્યો છે. ઈરાનની સર્વોચ્ચ રાષ્ટ્રીય સુરક્ષા પરિષદની ઈમરજન્સી બેઠકમાં આ આદેશ આપવામાં આવ્યો હતો. નોંધનીય છે કે આ હુમલાનો સામનો કરવા માટે ઈઝરાયેલે પણ તૈયારીઓ કરી લીધી છે.
ઇઝરાયેલ ડિફેન્સ ફોર્સિસ (IDF) એ ઇઝરાયેલ પરના કોઈપણ ઈરાની હુમલા માટે તૈયાર છે. ઈઝરાયેલના સંરક્ષણ મંત્રીના કાર્યાલયના સૂત્રોએ સમાચાર એજન્સી IANSને જણાવ્યું કે ઈરાનની ધમકી બાદ IDFએ કોઈપણ પરિસ્થિતિનો સામનો કરવા માટે પોતાની જાતને તૈયાર કરી લીધી છે.
શું છે ઈઝરાયેલની યોજના?
ઇઝરાયેલના સંરક્ષણ મંત્રાલયના સૂત્રોના જણાવ્યા અનુસાર, ઈરાન તેના પ્રોક્સી હમાસ અને હિઝબુલ્લાહ અને હુથી બળવાખોર જૂથનો ઉપયોગ કરીને સમુદ્રમાં ઈઝરાયેલ પર હુમલો કરી શકે છે. ઇઝરાયેલના સંરક્ષણ મંત્રાલયના સૂત્રોએ IANS ને જણાવ્યું કે તેના ગુપ્તચર અહેવાલો અનુસાર, કેટલાક હુમલાઓ ઇરાન દ્વારા સીધા અથવા તેના પ્રોક્સીઓ દ્વારા કરવામાં આવી શકે છે, અને ઉમેર્યું હતું કે ઇઝરાયેલ તેના માટે તૈયાર છે.
ઇઝરાયેલની સુરક્ષા પરિષદે બુધવારે તેની તાકીદની બેઠકમાં ખમેનીની ખુલ્લી ધમકીને પગલે તેલ અવીવ અને હૈફામાં તેના સૈન્ય મથકોને મજબૂત બનાવવાનો આદેશ આપ્યો હતો.