કુપવાડામાં સેનાએ બનાવ્યું મોટા આતંકવાદી ષડયંત્રને નિષ્ફળ, આટલા આતંકવાદીઓ માર્યા ગયા

જમ્મુ-કાશ્મીરના કુપવાડામાં સેનાને મોટી સફળતા મળી છે. સેનાની ટીમે ઘૂસણખોરીનો પ્રયાસ કરી રહેલા 2 પાકિસ્તાની આતંકવાદીઓને ઠાર માર્યા હતા. આ આતંકવાદીઓની ઓળખ હજુ જાહેર કરવામાં આવી નથી. આ એન્કાઉન્ટરના થોડા દિવસો પહેલા ડોડામાં આતંકવાદીઓ સાથેની અથડામણમાં સેનાના ચાર જવાનો (એક કેપ્ટન સહિત) શહીદ થયા હતા.

કુપવાડામાં સેના અને આતંકવાદીઓ વચ્ચેની અથડામણની વિગતો શેર કરતા, ભારતીય સેનાના ચિનાર કોર્પ્સે લખ્યું, “આ વિસ્તારમાં સેનાનું સર્ચ ઓપરેશન હજુ પણ ચાલુ છે.”

મળતી માહિતી મુજબ, ઉત્તર કાશ્મીરના કુપવાડા જિલ્લાના કેરન સેક્ટરમાં સુરક્ષા દળો અને ઘૂસણખોરી કરી રહેલા પાકિસ્તાની આતંકવાદીઓ વચ્ચે જોરદાર અથડામણ થઈ હતી. સેનાના અધિકારીઓએ જણાવ્યું હતું કે છુપાયેલા આતંકવાદીઓએ 6 રાષ્ટ્રીય રાઇફલ્સ (RR) અને કુપવાડા પોલીસ સહિત સુરક્ષા દળો પર ગોળીબાર કર્યા પછી એન્કાઉન્ટર શરૂ થયું હતું. જો કે હજુ સુધી તેની ઓળખ થઈ શકી નથી.

સુરક્ષા દળોએ નિયંત્રણ રેખા (LOC) નજીક કેરન સેક્ટરમાં આતંકવાદીઓને ઠાર કર્યા બાદ સર્ચ ઓપરેશન શરૂ કર્યું છે. સેનાને આશંકા છે કે આ વિસ્તારમાં વધુ આતંકીઓ છુપાયેલા હોવાની શક્યતા છે. વહેલી સવારે જમ્મુના રાજૌરી જિલ્લાના સુંદરબની વિસ્તારમાં અંકુશ રેખા નજીક શંકાસ્પદ ગતિવિધિઓ જોતાં સેનાએ ગોળીબાર કર્યો હતો.

ડોડામાં બે દિવસમાં આતંકવાદીઓ સાથે બે એન્કાઉન્ટર

અગાઉ સેનાએ જમ્મુ-કાશ્મીરના ડોડા જિલ્લામાં બે દિવસમાં પાકિસ્તાની આતંકવાદીઓ સાથે બે એન્કાઉન્ટર કર્યા હતા. આ પહેલા 16 જુલાઈના રોજ પાકિસ્તાની આતંકવાદી સંગઠન જૈશ-એ-મોહમ્મદના સશસ્ત્ર આતંકવાદીઓ સાથે ભીષણ અથડામણમાં એક કેપ્ટન સહિત ચાર સેનાના જવાનો શહીદ થયા હતા. ત્યારબાદ ડોડા જિલ્લાના જંગલ વિસ્તારમાં બુધવારે મોડી રાત્રે આતંકવાદીઓ સાથેની અથડામણમાં સેનાના બે જવાન ઘાયલ થયા હતા. અધિકારીઓએ જણાવ્યું કે અથડામણ કાસ્તીગઢ વિસ્તારના જદ્દન બાટા ગામમાં સવારે લગભગ 2 વાગ્યે થઈ જ્યારે આતંકવાદીઓએ સર્ચ ઓપરેશન હાથ ધરવા માટે એક સરકારી શાળામાં સ્થાપિત અસ્થાયી સુરક્ષા શિબિર પર ગોળીબાર શરૂ કર્યો.