યમનના હુથી બળવાખોરોએ દાવો કર્યો છે કે સ્થળાંતરિત આફ્રિકન કેદીઓ ધરાવતી જેલ પર અમેરિકાના કથિત હવાઈ હુમલામાં 68 લોકો માર્યા ગયા છે. અગાઉ તેઓએ દાવો કર્યો હતો કે આ હુમલાઓમાં ઓછામાં ઓછા 30 લોકો માર્યા ગયા હતા પરંતુ બાદમાં મૃત્યુઆંક વધારવામાં આવ્યો હતો. બળવાખોરોના નાગરિક સંરક્ષણ સંગઠને અલગથી જણાવ્યું હતું કે હુમલામાં 47 અન્ય લોકો ઘાયલ થયા છે.
તેમણે કહ્યું કે આ જગ્યાએ લગભગ ૧૧૫ કેદીઓ રાખવામાં આવ્યા હતા. સાદા પ્રાંતમાં હુમલો કરવાના હુથી બળવાખોરોના આરોપો અંગેના પ્રશ્નોના જવાબમાં યુએસ સૈન્યએ તાત્કાલિક જવાબ આપ્યો ન હતો. હુથી બળવાખોરોના અલ-મસિરાહ સેટેલાઇટ ન્યૂઝ ચેનલ દ્વારા પ્રસારિત ગ્રાફિક ફૂટેજમાં કથિત રીતે મૃતકોના મૃતદેહો અને ઘાયલો પડેલા દેખાતા હતા.
યુએસ આર્મીના સેન્ટ્રલ કમાન્ડે રાત્રે જારી કરેલા એક નિવેદનમાં જણાવ્યું હતું કે તેમના ‘ઓપરેશન રફરાઇડર’ અભિયાન હેઠળ સેંકડો હુથી લડવૈયાઓ અને તેમના ઘણા નેતાઓ માર્યા ગયા છે. આમાં એવા લોકો પણ શામેલ છે જેઓ હુથી મિસાઇલ અને ડ્રોન કાર્યક્રમ સાથે સંકળાયેલા હતા. જોકે, સેનાએ કોઈ નેતાનું નામ લીધું નથી. અમેરિકાએ કહ્યું છે કે તે તેના હવાઈ હુમલા ચાલુ રાખશે. આ હુમલાઓ 15 માર્ચે રાષ્ટ્રપતિ ડોનાલ્ડ ટ્રમ્પના નેતૃત્વમાં શરૂ થયા હતા.
નિવેદનમાં કહેવામાં આવ્યું છે કે, “ઈરાન નિઃશંકપણે હુથીઓને સમર્થન આપી રહ્યું છે. હુથીઓ ફક્ત ઈરાની સરકારના સમર્થનથી જ આપણા દળો પર હુમલો કરી શકે છે.” સોમવારે સવારે, હુથીઓએ ફૂટેજ જાહેર કર્યા હતા જેમાં તેઓએ જણાવ્યું હતું કે સનાની ઉત્તરે આવેલા બાની અલ-હરિથ જિલ્લાને નિશાન બનાવીને યુએસ ગોળીબાર કરી રહ્યું છે. ફૂટેજમાં, કાટમાળ વચ્ચે લોહીના ડાઘ અને એક કચડી ગયેલો ટ્રક જોઈ શકાય છે.
