લંડન હાઈકોર્ટથી ભારતને મોટો ફટકો, પ્રત્યાર્પણ સામે સંજય ભંડારીની અપીલ સ્વીકારાઈ

લંડન હાઈકોર્ટે શુક્રવારે (28 ફેબ્રુઆરી) ભારતીય ઉદ્યોગપતિ સંજય ભંડારીની ભારત પ્રત્યાર્પણ સામેની અપીલ સ્વીકારી. ભંડારી જે સંરક્ષણ ક્ષેત્રના સલાહકાર છે. તેમની સામે કરચોરી અને મની લોન્ડરિંગના ગંભીર આરોપો છે.

ડિસેમ્બર 2023 માં લોર્ડ જસ્ટિસ ટીમોથી હોલરોયડ અને જસ્ટિસ કરેન સ્ટેઈનની બેન્ચે આ કેસની સુનાવણી કરી. સુનાવણી બાદ, કોર્ટે માનવ અધિકારોના આધારે 62 વર્ષીય ભંડારીની અપીલ સ્વીકારીને પોતાનો ચુકાદો આપ્યો.

પ્રત્યાર્પણના આદેશથી રાહત

કોર્ટે નવેમ્બર 2022માં વેસ્ટમિન્સ્ટર મેજિસ્ટ્રેટ કોર્ટ દ્વારા આપવામાં આવેલા નિર્ણય અને તત્કાલીન બ્રિટિશ ગૃહમંત્રી સુએલા બ્રેવરમેનના પ્રત્યાર્પણના આદેશને ફગાવી દીધો. આ નિર્ણય હેઠળ, ભંડારીને ભારતમાં ફોજદારી કાર્યવાહીનો સામનો કરવાથી મુક્ત કરવામાં આવ્યા છે.

તિહાર જેલમાં સુરક્ષા અંગે ચિંતાઓ

ચુકાદામાં કહેવામાં આવ્યું છે કે ભંડારીને દિલ્હીની તિહાર જેલમાં કેદીઓ અથવા અધિકારીઓ તરફથી ધમકીઓ અને ખંડણીનો વાસ્તવિક ભય હોઈ શકે છે. કોર્ટે એ પણ સ્વીકાર્યું કે જેલમાં ભીડભાડ અને સ્ટાફની અછતને કારણે તેમની સુરક્ષા સુનિશ્ચિત કરવી મુશ્કેલ બનશે.

લંડન હાઈકોર્ટે પ્રત્યાર્પણ પર ચિંતા વ્યક્ત કરી

યુરોપિયન કન્વેન્શન ઓન હ્યુમન રાઇટ્સ (ECHR) ના આર્ટિકલ 3 ના આધારે ભંડારીની અપીલ સ્વીકારવામાં આવી હતી. કોર્ટે સ્વીકાર્યું કે ભારત સરકાર દ્વારા તેમની સુરક્ષા અંગે આપવામાં આવેલા આશ્વાસનો પૂરતા નથી અને પ્રત્યાર્પણ પછી તેમની સાથે દુર્વ્યવહાર થવાની શક્યતા રહેશે.

ભંડારી સામે પ્રત્યાર્પણની બે વિનંતીઓ

ભંડારી સામે બે પ્રત્યાર્પણ વિનંતીઓ કરવામાં આવી હતી, પહેલી જૂન 2020 માં મની લોન્ડરિંગ નિવારણ અધિનિયમ, 2002 હેઠળ અને બીજી જૂન 2021 માં બ્લેક મની અને ટેક્સ ઇમ્પોઝીશન અધિનિયમ, 2015 હેઠળ. જોકે, આ નિર્ણય બાદ તેમનું ભારત પ્રત્યાર્પણ હવે અનિશ્ચિત બની ગયું છે.