મધ્યપ્રદેશના ઈન્દોરમાં પાકિસ્તાનની ગુપ્તચર એજન્સી ISIના રિક્રુટમેન્ટ મોડ્યુલનો પર્દાફાશ થયો છે. રાષ્ટ્રીય સુરક્ષા એજન્સીઓના ઈનપુટ પર ઈન્દોરના ખજરાના વિસ્તારમાંથી ત્રણ યુવકોની ધરપકડ કરવામાં આવી છે. આરોપીઓના નામ અયાન, જુનૈદ અને કાસિમ જણાવવામાં આવી રહ્યા છે.
એડિશનલ પોલીસ કમિશનર અમિત સિંહે જણાવ્યું કે, ત્રણેય યુવકો ઈન્સ્ટાગ્રામ દ્વારા પાકિસ્તાનની આઈએસઆઈ સાથે જોડાયેલા હતા અને કાશ્મીરમાં જેહાદ માટે જવાની તૈયારી કરી રહ્યા હતા. આ આરોપીઓની ગતિવિધિઓની માહિતી મળતાં ઈન્દોર પોલીસ સાથે મળીને ઓપરેશન હાથ ધરવામાં આવ્યું હતું અને તેમની ધરપકડ કરવામાં આવી હતી.
ACPના જણાવ્યા અનુસાર, આરોપી યુવક ISI દ્વારા કરવામાં આવી રહેલી ભરતીની જાળમાં ફસાયા હતા. તેની સાથે સંકળાયેલા અન્ય શકમંદો વિશે પણ માહિતી એકત્રિત કરવામાં આવી રહી છે. ઈન્દોર પોલીસ, રાષ્ટ્રીય એજન્સી અને સ્થાનિક એજન્સીઓ આ મામલે સાથે મળીને કામ કરી રહી છે. કેસની ગંભીરતાને ધ્યાને લઈ અને તપાસને આગળ ધપાવવા માટે આરોપીની પૂછપરછ શરૂ કરવામાં આવી છે. ટૂંક સમયમાં વિગતવાર ખુલાસો કરવામાં આવશે.