ઝારખંડના મુખ્યમંત્રી હેમંત સોરેને ગુરુવારે (5 ડિસેમ્બર) કેબિનેટનું વિસ્તરણ કર્યું. તેમણે પોતાની કેબિનેટમાં 11 ચહેરાઓને સ્થાન આપ્યું છે. શપથ લેનારા નેતાઓમાં 6 જેએમએમના, ચાર કોંગ્રેસના અને એક આરજેડીના છે. રાજ્યપાલ સંતોષ ગંગવારે તમામ નેતાઓને શપથ લેવડાવ્યા હતા. રાજ્યપાલે સ્ટીફન મરાંડીને ઝારખંડ વિધાનસભાના ‘પ્રોટેમ સ્પીકર’ તરીકે શપથ લેવડાવ્યા હતા.
JMM 6
- સુદિવ્ય કુમાર સોનુ (ગિરિડીહ)
- યોગેન્દ્ર પ્રસાદ (ગોમિયા)
- ચમરા લિન્ડા (બિશનપુર)
- રામદાસ સોરેન (ઘાટશિલા)
- દીપક બિરવા (ચાઈબાસા)
- હફીઝુલ હસન (માધુપુર)
કોંગ્રેસ 4
- ઈરફાન અંસારી
- શિલ્પી નેહા તિર્કી
- દીપિકા પાંડે સિંહ
- રાધા કૃષ્ણ કિશોર
આરજેડી 1
સંજય પ્રસાદ યાદવ
છ નવા અને પાંચ જૂના ચહેરા છે. નવા મંત્રીઓમાં રાધાકૃષ્ણ કિશોર, સુદિવ્યા સોનુ, ચમરા લિન્ડા, યોગેન્દ્ર પ્રસાદ, શિલ્પી નેહા તિર્કી અને સંજય યાદવનો સમાવેશ થાય છે. આ વખતે સત્તાધારી ગઠબંધનની 8 મહિલાઓ ચૂંટણી જીતીને વિધાનસભામાં પહોંચી છે. આમાંથી બેને કેબિનેટમાં સ્થાન મળ્યું છે.
સંથાલ પરગણામાંથી સૌથી વધુ ચાર મંત્રી બનાવવામાં આવ્યા છે. કોલ્હાન, દક્ષિણ છોટાનાગપુર અને ઉત્તર છોટાનાગપુર વિભાગમાંથી બે-બે ધારાસભ્યો અને પલામુ વિભાગના એક ધારાસભ્યને કેબિનેટમાં સ્થાન મળ્યું છે.
હેમંત સોરેને કેબિનેટમાં વિવિધ સમુદાયોને પ્રતિનિધિત્વ આપીને સામાજિક-રાજકીય સમીકરણો ઉકેલવાનો પ્રયાસ કર્યો છે. ચાર ધારાસભ્યોને અનુસૂચિત જનજાતિમાંથી, એક અનુસૂચિત જાતિમાંથી, ત્રણ OBCમાંથી, બે લઘુમતી સમુદાયમાંથી અને એકને ઉચ્ચ જાતિના સમુદાયમાંથી પ્રતિનિધિત્વ આપવામાં આવ્યું છે.
81 સભ્યોની ઝારખંડ વિધાનસભામાં, સોરેનની આગેવાની હેઠળ ચાર પક્ષોના ગઠબંધનને 56 બેઠકો મળી હતી. ઝારખંડ મુક્તિ મોરચા (જેએમએમ)ને 34, કોંગ્રેસને 16, આરજેડીને ચાર અને સીપીઆઈ (એમએલ)ને બે બેઠકો મળી છે. CPI(ML) એ કેબિનેટમાંથી બહાર રહેવાનો નિર્ણય લીધો હતો.
હેમંત સોરેનની ગત સરકારના સાત મંત્રીઓ આ વખતે કેબિનેટમાં જોવા મળશે નહીં. અગાઉની સરકારોમાં સૌથી વયોવૃદ્ધ મંત્રી રહેલા રામેશ્વર ઓરાંને આ વખતે જગ્યા મળી શકી નથી. સત્યાનંદ ભોક્તા આ વખતે ચૂંટણી લડી શક્યા ન હતા, જ્યારે ચંપાઈ સોરેન પહેલાથી જ શાસક ગઠબંધનને અલવિદા કહી ચૂક્યા હતા અને ભાજપમાં જોડાયા હતા. મુખ્યમંત્રી હેમંત સોરેન આજે સાંજ સુધીમાં મંત્રીઓના પોર્ટફોલિયોની વહેંચણી કરી શકે છે.