ભારતીય ટીમે પ્રથમ ટેસ્ટ મેચમાં ઓસ્ટ્રેલિયાને 295 રનથી હરાવીને ઈતિહાસ રચ્યો હતો. ટીમ ઈન્ડિયાએ પર્થમાં 16 વર્ષ બાદ પ્રથમ ટેસ્ટ મેચ જીતી છે. આ પહેલા વર્ષ 2008માં કુંબલેની કેપ્ટનશિપમાં ભારતે ઓસ્ટ્રેલિયાને હરાવ્યું હતું. જોકે, આ મેચ પર્થના ઓપ્ટસ સ્ટેડિયમમાં રમાઈ હતી. બુમરાહની કપ્તાનીમાં ભારતીય ટીમે શાનદાર પ્રદર્શન કર્યું હતું. ભારતીય ટીમ ઓસ્ટ્રેલિયાને હરાવનારી પ્રથમ મુલાકાતી ટીમ પણ બની છે.
ચોથા દિવસના પ્રથમ સેશનમાં ભારતીય સ્ટેન્ડ-ઇન કેપ્ટન જસપ્રિત બુમરાહે ભારતને પ્રથમ સફળતા અપાવી હતી. ઓસ્ટ્રેલિયાએ ખતરનાક બેટ્સમેન ટ્રેવિસ હેડને 89ના સ્કોર પર આઉટ કરીને મોટો ઝટકો આપ્યો હતો. આ પછી નીતિશ રેડ્ડીએ 47ના સ્કોર પર મિશેલ માર્શને આઉટ કરીને ઓસ્ટ્રેલિયાની આશાઓ ખતમ કરી નાખી. આ પછી વોશિંગ્ટન સુંદરે એક જ ઓવરમાં બે વિકેટ લઈને કામ પૂરું કર્યું. આ પછી હર્ષિત રાણાએ એલેક્સ કેરીને આઉટ કરીને અંતિમ ખીલી મારી હતી.
બેટ અને બોલથી ચમકતા ખેલાડીઓ
ભારતીય ટીમે ત્રીજા દિવસે શાનદાર બેટિંગ કરી હતી. યશસ્વી જયસ્વાલે બીજા દિવસે અણનમ પરત ફરીને સદી ફટકારી હતી. તે 161 રન બનાવીને આઉટ થયો હતો. કેએલ રાહુલે પણ 77 રનની ઇનિંગ રમી હતી. આ પછી વિરાટ કોહલીએ ઓસ્ટ્રેલિયામાં છઠ્ઠી સદી પૂરી કરી. કોહલીએ 143 બોલમાં 100 રનની અણનમ ઇનિંગ રમી હતી. ભારતે 533 ની કુલ લીડ લેતાની સાથે જ બીજી ઇનિંગ 487/6 રન પર ડિકલેર કરી અને ઓસ્ટ્રેલિયાને જીતવા માટે 534 રનનો ટાર્ગેટ આપ્યો. ત્રીજા દિવસની રમત પૂરી થાય તે પહેલા ભારતે ઓસ્ટ્રેલિયાની ત્રણ વિકેટ ઝડપી હતી. બુમરાહે બે અને સિરાજે એક વિકેટ લઈને જીતનો પાયો નાખ્યો હતો. ઓસ્ટ્રેલિયાનો બીજો દાવ 238 રનના સ્કોર પર સમાપ્ત થયો હતો.
ભારતીય ટીમ પર્થ જીતનારી પ્રથમ ટીમ બની છે
પર્થમાં ભારતની આ જીત 2008 બાદ મળી છે. 16 જાન્યુઆરી, 2008ના રોજ, અનિલ કુંબલેની કપ્તાની હેઠળ, ભારતીય ટીમે પર્થના WACA સ્ટેડિયમમાં રમાયેલી ત્રીજી ટેસ્ટ મેચમાં ઓસ્ટ્રેલિયાને 72 રનથી હરાવ્યું હતું. ઈરફાન પઠાણને તેના ઓલરાઉન્ડ પ્રદર્શન માટે પ્લેયર ઓફ ધ મેચનો ખિતાબ આપવામાં આવ્યો હતો. હવે 16 વર્ષ બાદ ભારતે પર્થના ઓપ્ટસ સ્ટેડિયમમાં ઓસ્ટ્રેલિયાને હરાવ્યું છે. આ સિવાય ભારત પર્થમાં ઓસ્ટ્રેલિયાને હરાવનારી પ્રથમ મુલાકાતી ટીમ બની છે.