‘ધરતી ખાઈ ગઈ કે આકાશ ગળી ગયું..’ઈરાનના કુદ્સ ફોર્સ ચીફ થયા ગાયબ,ઈઝરાયેલ પર કરી શંકા

ઈરાને 1 ઓક્ટોબર મંગળવારના રોજ ઈઝરાયેલ પર 180 થી વધુ બેલેસ્ટિક મિસાઈલોથી હુમલો કર્યો હતો. બે દિવસ બાદ ઈરાનના શક્તિશાળી કુદ્સ ફોર્સના વડા ઈસ્માઈલ કાની ગુમ છે. ઈરાન તેમની સાથે સંપર્ક સ્થાપિત કરવામાં સક્ષમ નથી. મળતી માહિતી મુજબ હસન નસરાલ્લાહના મોત બાદ તે લેબનોન પહોંચી ગયો હતો. પરંતુ હવે તે કઈ સ્થિતિમાં છે તે કોઈને ખબર નથી.

ઇઝરાયેલ હુમલા બાદ ગુમ

ઈરાનના બે સુરક્ષા અધિકારીઓએ જણાવ્યું હતું કે ગયા અઠવાડિયે ગુરુવારે બેરૂતમાં ઈઝરાયેલી હવાઈ હુમલા બાદ ઈસ્માઈલ કાનીનો કોઈ પત્તો નથી. ઈરાની અધિકારીના જણાવ્યા અનુસાર, તે બેરૂતના દહિયા વિસ્તારમાં હતો. અહીં ગુરુવારે ઈઝરાયેલે હિઝબુલ્લાહના સંભવિત ઉત્તરાધિકારી હાશિમ સફીઉદ્દીનને સ્ટ્રાઈકમાં નિશાન બનાવ્યું હતું. જો કે ઈરાનના અધિકારીનું કહેવું છે કે ઈસ્માઈલ સફીઉદ્દીનને મળ્યો ન હતો. બીજી તરફ બેરૂત હુમલામાં ઈસ્માઈલ કાની માર્યા ગયાના સમાચાર પર ઈઝરાયેલે કોઈ સ્પષ્ટ ટિપ્પણી કરી નથી.

સફીઉદ્દીન પણ ગુમ

હિઝબુલ્લાનું કહેવું છે કે તેના નેતા હાશિમ સફીઉદ્દીનનો પણ સંપર્ક થઈ શક્યો નથી. તેની શોધખોળના પ્રયાસો કરવામાં આવી રહ્યા છે. પરંતુ ઈઝરાયેલ આ શોધને આગળ વધવા દેતું નથી. 27 સપ્ટેમ્બરે ઇઝરાયેલે બેરૂતમાં એક મોટા બોમ્બ વિસ્ફોટમાં હિઝબુલ્લાના ચીફ હસન નસરાલ્લાહને મારી નાખ્યો હતો. આ પછી ઉત્તરાધિકારી તરીકે હાશિમ સફીઉદ્દીનનું નામ સૌથી આગળ હતું.

ઈસ્માઈલ કાની વિશે

67 વર્ષીય ઈસ્માઈલ કાનીનો જન્મ મશહાદમાં થયો હતો. આ શહેર ઉત્તર-પૂર્વ ઈરાનમાં આવેલું છે. તેઓ 1980ના દાયકામાં ઈરાન-ઈરાક યુદ્ધ દરમિયાન રિવોલ્યુશનરી ગાર્ડ્સમાં જોડાયા હતા. 2020 માં, કુદ્સ ફોર્સના વડા કાસિમ સુલેમાની ઇરાકની રાજધાની બગદાદમાં યુએસ ડ્રોન હુમલામાં માર્યા ગયા હતા. આ પછી ઈરાને ઈસ્માઈલ કાનીને રિવોલ્યુશનરી ગાર્ડ્સ કોર્પ્સની વિદેશી સૈન્ય ગુપ્તચર સેવાના વડા તરીકે નિયુક્ત કર્યા.