ઈંગ્લેન્ડ અને ઓસ્ટ્રેલિયા વચ્ચે રમાઈ રહેલી 5 મેચની વનડે શ્રેણીમાં આખરે યજમાન ઈંગ્લિશ ટીમનું ખાતું ખુલી ગયું છે. ઈંગ્લેન્ડે ત્રીજી વનડેમાં ઓસ્ટ્રેલિયાને હરાવ્યું. આ સાથે ઈંગ્લેન્ડની ટીમ સતત 7 હાર બાદ ઓસ્ટ્રેલિયા સામે પ્રથમ જીત નોંધાવવામાં સફળ રહી હતી.
ઈંગ્લેન્ડ અને ઓસ્ટ્રેલિયા વચ્ચે 5 ODI મેચોની રોમાંચક શ્રેણી રમાઈ રહી છે. શ્રેણીની પ્રથમ 2 મેચ જીત્યા બાદ ઓસ્ટ્રેલિયાનો ઉત્સાહ ઊંચો હતો, પરંતુ ત્રીજી વનડેમાં યજમાન ઈંગ્લેન્ડે શાનદાર વાપસી કરીને જીત મેળવી હતી. વરસાદથી પ્રભાવિત આ મેચમાં કેપ્ટન હેરી બ્રુકે ઈંગ્લેન્ડ માટે શાનદાર સદી ફટકારી હતી, જેના કારણે ઈંગ્લેન્ડની ટીમે ડકવર્થ-લુઈસ મેથડ (DLS)નો ઉપયોગ કરીને ઓસ્ટ્રેલિયાને 46 રને હરાવીને શ્રેણીમાં પોતાની જાતને જીવંત રાખી હતી.
ઈંગ્લેન્ડના હાથે આ હાર સાથે ઓસ્ટ્રેલિયાની સતત 14 મેચોની જીતનો સિલસિલો પણ તૂટી ગયો છે. કાંગારૂ ટીમની છેલ્લી વનડે હાર ગયા વર્ષે વર્લ્ડ કપ 2023માં લખનૌમાં દક્ષિણ આફ્રિકા સામે થઈ હતી. ત્યારથી ઓસ્ટ્રેલિયન ટીમ વનડેમાં જીતના રથ પર સવાર હતી. જેમાં વર્લ્ડ કપ 2023ની ફાઈનલ પણ સામેલ હતી.
ઑસ્ટ્રેલિયા હવે સૌથી વધુ સંખ્યામાં ODI ઇન્ટરનેશનલ મેચ જીતવાની બાબતમાં પ્રથમ પછી બીજા સ્થાને છે. ઇંગ્લેન્ડ સામેની બીજી વન-ડે જીત્યા બાદ કાંગારૂ ટીમે આ સિદ્ધિ મેળવી, લંકાના સતત 13 વનડે જીતના રેકોર્ડને પાછળ છોડી દીધો. વનડેમાં સતત સૌથી વધુ જીતનો રેકોર્ડ પણ ઓસ્ટ્રેલિયાના નામે છે. આ ટીમે જાન્યુઆરી 2003 થી મે 2003 વચ્ચે સતત 21 ODI મેચ જીતી હતી. એટલું જ નહીં ઓસ્ટ્રેલિયા સામે સતત સાત પરાજય બાદ ઈંગ્લેન્ડની આ પ્રથમ વનડે જીત છે.
ODI મેચોમાં સતત સૌથી વધુ જીત
- 21 – ઓસ્ટ્રેલિયા (જાન્યુઆરી 2003 – મે 2003)
- 14 – ઓસ્ટ્રેલિયા (ઓક્ટોબર 2023 – સપ્ટેમ્બર 2024)
- 13 – શ્રીલંકા (જૂન 2023 – ઓક્ટોબર 2023)
- 12 – દક્ષિણ આફ્રિકા (ફેબ્રુઆરી 2005 – ઓક્ટોબર 2005)
- 12 – પાકિસ્તાન (નવેમ્બર 2007 – જૂન 2008)
- 12 – દક્ષિણ આફ્રિકા (સપ્ટેમ્બર 2016 – ફેબ્રુઆરી 2017)
મેચ સ્થિતિ
ત્રીજી વનડેમાં પ્રથમ બેટિંગ કરતા ઓસ્ટ્રેલિયાએ 7 વિકેટના નુકસાને 304 રન બનાવ્યા હતા જેમાં સ્મિથે 82 બોલમાં 60 રન અને એલેક્સ કેરીએ 65 બોલમાં અણનમ 77 રનનું યોગદાન આપ્યું હતું. આ પછી, લક્ષ્યનો પીછો કરતી વખતે યજમાન ઇંગ્લેન્ડે 11 રનના સ્કોર પર બે વિકેટ ગુમાવી દીધી હતી. ફિલ સોલ્ટ પોતાનું ખાતું પણ ખોલી શક્યો નહોતો અને બેન ડકેટ માત્ર 8 રન બનાવીને પેવેલિયન પરત ફર્યો હતો. ત્યારબાદ હેરી બ્રુક અને વિલ જેક્સની જોડીએ શાનદાર ભાગીદારી કરી અને ત્રીજી વિકેટ માટે 156 રન જોડ્યા.
આ દરમિયાન બ્રુકે તેની ODI કારકિર્દીની પ્રથમ સદી ફટકારી હતી. તેણે 94 બોલમાં 110 રનની અણનમ ઇનિંગ રમી હતી. જ્યારે વિલ જેક્સે 82 બોલમાં 84 રનની મહત્વપૂર્ણ ઇનિંગ રમી હતી. જ્યારે ઈંગ્લેન્ડની ઈનિંગની 38મી ઓવર ફેંકાઈ રહી હતી ત્યારે વરસાદ પડ્યો હતો જેના કારણે મેચ રોકવી પડી હતી. સતત ભારે વરસાદને કારણે આખરે અમ્પાયરોએ મેચ ખતમ કરવાનો નિર્ણય લીધો હતો. જ્યારે મેચ રોકવામાં આવી ત્યારે ઈંગ્લેન્ડ ડકવર્થ-લુઈસ નિયમ મુજબ 46 રનથી આગળ હતું. આ જ કારણ હતું કે ઈંગ્લેન્ડ આ મેચ જીતવામાં સફળ રહ્યું હતું.