મુંબઈના સૌથી મોટા ઝૂંપડપટ્ટી વિસ્તાર ધારાવીમાં મસ્જિદના ગેરકાયદે ભાગને તોડવા BMCની ટીમ પહોંચી છે. સુરક્ષા માટે મોટી સંખ્યામાં પોલીસ તૈનાત કરવામાં આવી છે. ટીમના આગમન બાદ આ વિસ્તારમાં વાતાવરણ તંગ બની ગયું છે. મુસ્લિમ સમુદાય BMCની કાર્યવાહીનો વિરોધ કરી રહ્યો છે અને સૂત્રોચ્ચાર કરી રહ્યો છે. મસ્જિદના ગેરકાયદે ભાગને તોડી પાડવાની નોટિસ પહેલા જ મોકલવામાં આવી હતી. મળતી માહિતી મુજબ, નોટિસનો કોઈ જવાબ કોઈ સંસ્થા કે મસ્જિદ દ્વારા આપવામાં આવ્યો નથી.
અહેવાલો અનુસાર, BMC ટીમ પહોંચ્યા પછી જ મોટી સંખ્યામાં લોકો એકઠા થવા લાગ્યા. આ પછી સૂત્રોચ્ચાર શરૂ થયો અને કેટલાક લોકોએ રસ્તા પર બેસીને વિરોધ કરવાનું શરૂ કર્યું. આ પછી BMCની ટીમે કેટલાક લોકોને પોલીસ સ્ટેશનમાં વાતચીત માટે બોલાવ્યા. કેટલાક લોકો વાત કરવા પોલીસ સ્ટેશન પહોંચ્યા હતા. BMC ટીમે ધારાવીના લોકોને તેમના ઘરે જવાની અપીલ કરી છે અને હાલ માટે કાર્યવાહી પાછી ખેંચી લીધી છે. તેમ છતાં લોકો પાછા જવા તૈયાર નથી.
આ 25 વર્ષ જૂની મસ્જિદ ધારાવીના 90 ફૂટ રોડ પર છે. મુસ્લિમ સમુદાયનું કહેવું છે કે આ મસ્જિદ ઘણી જૂની છે. આ સિવાય શેરીઓમાં નમાઝ પઢવા પર પ્રતિબંધ લગાવ્યા બાદ નમાજની જગ્યાની જરૂર છે. આ મસ્જિદમાંથી કોઈને કોઈ અંગત લાભ મળતો નથી. મસ્જિદનું નામ મહેબૂબ-એ-સુબાનિયા મસ્જિદ છે.
ધારાવીમાં વધી રહેલા હંગામાને જોઈને કોંગ્રેસ સાંસદ વર્ષા ગાયકવાડ મુખ્યમંત્રી એકનાથ શિંદેને મળ્યા હતા. તેમની સાથે મિલિંદ દેવરા પણ હાજર હતા. બંનેએ આ મામલે હસ્તક્ષેપની માંગ કરી હતી. તેમણે કહ્યું કે BMCને કાર્યવાહી રોકવાનો આદેશ આપવો જોઈએ. આ પ્રકારનો આ પહેલો કિસ્સો નથી. આ પહેલા હિમાચલ પ્રદેશના શિમલામાં મસ્જિદના ગેરકાયદે ભાગને તોડી પાડવાને લઈને હોબાળો થયો હતો. આ અંગે ઘણા દિવસોથી તણાવ હતો.