બાંગ્લાદેશના 24 વર્ષીય ફાસ્ટ બોલર હસન મહમૂદે એ કરી બતાવ્યું જે આ પહેલા કોઈ બાંગ્લાદેશી ખેલાડી નથી કરી શક્યો. પ્રથમ વખત બાંગ્લાદેશનો કોઈ બોલર ભારતમાં ટેસ્ટ મેચમાં એક ઇનિંગ્સમાં પાંચ વિકેટ લેવામાં સફળ રહ્યો છે. આ સિવાય હસન મહમૂદ બે બેક ટુ બેક ટેસ્ટ મેચમાં પાંચ વિકેટ ઝડપનાર બીજો બાંગ્લાદેશી બોલર બન્યો છે. અગાઉ ગયા મહિને તેણે પાકિસ્તાન સામે પણ પાંચ વિકેટ ઝડપી હતી. હસન મહમૂદે જસપ્રિત બુમરાહને આઉટ કરીને ભારતની ઇનિંગ્સનો અંત આણ્યો હતો. આ પહેલા હસને મેચના પહેલા દિવસે કેપ્ટન રોહિત શર્મા, શુભમન ગિલ, વિરાટ કોહલી અને રિષભ પંતને પેવેલિયનનો રસ્તો બતાવ્યો હતો. ભારતના પ્રવાસે આવેલી એશિયન ટીમોની વાત કરીએ તો છેલ્લી વખત ફાસ્ટ બોલરે પાંચ વિકેટ ઝડપી હતી, તે પાકિસ્તાનના યાસિર અરાફાત હતા. યાસિરે 2007માં બેંગલુરુ ટેસ્ટમાં પાંચ વિકેટ લીધી હતી.
આ ઉપરાંત, ચેન્નાઈની સ્પિન ફ્રેન્ડલી પિચ પર ટેસ્ટ ક્રિકેટમાં આ માત્ર છઠ્ઠી વખત છે, જ્યારે ઝડપી બોલરોએ એકસાથે 9 કે તેથી વધુ વિકેટ એક ઇનિંગમાં લીધી હોય. 1949માં વેસ્ટ ઈન્ડિઝ અને ભારત વચ્ચેની મેચમાં ફાસ્ટ બોલરોએ એક ઈનિંગમાં 10 વિકેટ ઝડપી હતી. આ પછી 1985માં ભારત અને ઈંગ્લેન્ડની મેચમાં પણ ઝડપી બોલરોએ એક ઈનિંગમાં 10 વિકેટ ઝડપી હતી. 1934ની ભારત વિરુદ્ધ ઈંગ્લેન્ડની મેચમાં ઝડપી બોલરોએ મળીને 9 વિકેટ લીધી હતી, 1975ની ભારત વિરુદ્ધ વેસ્ટ ઈન્ડિઝ ટેસ્ટ મેચમાં ઝડપી બોલરોએ બંને દાવમાં 9-9 વિકેટ લીધી હતી. 1979માં વેસ્ટ ઈન્ડિઝના ફાસ્ટ બોલરોએ એક ઈનિંગમાં 9 વિકેટ ઝડપી હતી અને હવે બાંગ્લાદેશના ફાસ્ટ બોલરોએ એક ઈનિંગમાં 9 વિકેટ ઝડપી છે.
મહેમૂદ સિવાય તસ્કીન અહેમદે ત્રણ વિકેટ લીધી હતી જ્યારે નાહીદ રાણાએ એક વિકેટ લીધી હતી જ્યારે સ્પિનર મહેંદી હસન મિરાઝે એક વિકેટ લીધી હતી. ભારત તરફથી આર અશ્વિને 113 રનની ઇનિંગ રમી હતી જ્યારે રવિન્દ્ર જાડેજાએ 86 રનનું યોગદાન આપ્યું હતું. યશસ્વી જયસ્વાલ 56 રન બનાવીને આઉટ થયો હતો.